📅 الجمعة ١٨ سبتمبر ٢٠٢٦📍 دوار السوايدة
نقطة من الديدامون
تنقذ حياة
حملة التبرع بالدم لأهل قرية الديدامون، بالتعاون مع بنك الدم في مستشفى فاقوس. سجّل دلوقتي في دقيقتين، وتعالى يوم الحملة.
- سجّلوا لحد دلوقتي
- …
- فاضل على الحملة
- ٤ أيام
- الميعاد: الجمعة ١٨ سبتمبر ٢٠٢٦
- المكان: دوار السوايدة، قرية الديدامون
- مع: بنك الدم، مستشفى فاقوس
- متنساش: البطاقة الشخصية
مواعيد الحملة بالساعة هتتعلن قريبًا.
﴿ وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ﴾
ليه تتبرع بالدم؟
كيس واحد ممكن ينقذ لحد ٣ أرواح
الدم بيتقسم لمكونات (كرات حمرا، بلازما، صفايح)، وكل مكون ممكن يروح لمريض مختلف.
التبرع نفسه حوالي ١٠ دقايق
والزيارة كلها بالتسجيل والكشف والراحة حوالي ساعة.
جسمك بيعوّض اللي اتبرعت بيه
السوائل بتتعوض في يوم أو اتنين، والكرات الحمرا في خلال أسابيع.
كشف وتحاليل ببلاش
هتعرف ضغطك ونسبة الهيموجلوبين، والدم بيتحلل في بنك الدم قبل ما يتستخدم.
مين ينفع يتبرع؟
✅ ينفع تتبرع لو
- سنك من ١٨ لـ ٦٠ سنة
- وزنك ٥٠ كيلو أو أكتر
- صحتك كويسة يوم التبرع
- آخر تبرع ليك من أكتر من ٣ شهور (أو أول مرة)
⏸️ استنى المرة دي لو
- الحامل والمرضعة
- لو عندك أو كان عندك فيروس سي أو بي، أو أمراض في الدم
القرار النهائي للدكتور في بنك الدم بعد الكشف يوم الحملة.
إزاي تستعد؟
هات البطاقة
بنك الدم لازم يسجلك بالبطاقة، من غيرها مش هينفع تتبرع.
كُل كويس
ما تجيش على معدة فاضية. كُل وجبة كويسة قبلها بساعتين أو تلاتة.
نام كويس
نوم كفاية الليلة اللي قبلها.
اشرب مية كتير
قبل التبرع وبعده.
إيه اللي هيحصل يوم الحملة؟
- الخطوة ١
التسجيل
بتدي البطاقة للاستقبال، وبتملا استمارة بنك الدم.
- الخطوة ٢
الكشف
الدكتور بيقيس الضغط والوزن ونسبة الهيموجلوبين.
- الخطوة ٣
التبرع
حوالي ١٠ دقايق، وإنت قاعد مرتاح.
- الخطوة ٤
الراحة
بتقعد شوية تشرب عصير وتاكل حاجة خفيفة، وبعدها تمشي.
فضل إغاثة الناس
التبرع بالدم من التعاون على الخير اللي حثنا عليه ديننا.
﴿ وَتَعَاوَنُوا عَلَى الْبِرِّ وَالتَّقْوَىٰ ﴾
﴿ وَأَحْسِنُوا ۛ إِنَّ اللَّهَ يُحِبُّ الْمُحْسِنِينَ ﴾
قال رسول الله ﷺ: «مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ، إِذَا اشْتَكَىٰ مِنْهُ عُضْوٌ تَدَاعَىٰ لَهُ سَائِرُ الْجَسَدِ بِالسَّهَرِ وَالْحُمَّىٰ»
قال رسول الله ﷺ: «مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنْيَا، نَفَّسَ اللَّهُ عَنْهُ كُرْبَةً مِنْ كُرَبِ يَوْمِ الْقِيَامَةِ، ... وَاللَّهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ»
قال رسول الله ﷺ: «أَحَبُّ النَّاسِ إِلَى اللَّهِ أَنْفَعُهُمْ لِلنَّاسِ»
أسئلة بتتسأل كتير
التبرع بالدم بيتعب أو بيضعف الجسم؟
لأ، للإنسان السليم. الكمية اللي بتتسحب صغيرة مقارنة بدم الجسم كله، والجسم بيعوضها. ممكن تحس بدوخة خفيفة لو ما أكلتش كويس، وعشان كده مهم تاكل وتشرب قبلها.
الإبرة والأدوات آمنة؟
أيوه. كل متبرع ليه أدوات جديدة معقمة بتستخدم مرة واحدة وبتترمي.
هعرف فصيلة دمي؟
بنك الدم بيحدد الفصيلة وبيعمل تحاليل على كل كيس. اسأل فريق بنك الدم يوم الحملة عن إزاي تعرف النتيجة.
لو مش متأكد ينفع أتبرع ولا لأ؟
تعالى، والدكتور هيكشف عليك ويقولك. ولو ما ينفعش المرة دي، مجيتك وتشجيعك لغيرك ليهم أجر برضه.
التسجيل على الموقع إجباري؟
مش إجباري، بس بيساعدنا ننظم اليوم ونعرف العدد المتوقع. اللي ما سجلش يقدر ييجي برضه.
فيه مقابل للتبرع؟
لأ. التبرع بالدم في مصر تطوعي ومجاني تمامًا بحكم القانون، وثوابه عند الله.
سؤالك مش هنا، أو عندك شكوى أو اقتراح؟ابعتلنا
مين عمل الموقع ده؟
م. مهدي عبدالمجيد محمد
مهندس برمجيات · تطبيقات الموبايل والويب
أحد أبناء قرية الديدامون، مهندس برمجيات بخبرة تتجاوز الخمس سنوات، ومحب لبلده. عملت الموقع ده عشان التسجيل في حملة التبرع يبقى سهل على أهلنا، والحملة تبقى منظمة ونوصل لأكبر عدد من المتبرعين.
اعرف أكتر ←الحاج عبدالمجيد محمد، رحمه الله
هذا العمل خالصٌ لوجه الله تعالى
وصدقةٌ جارية عن روح والدي الحاج عبدالمجيد محمد، رحمه الله، الذي توفي يوم ٢٩ يوليو ٢٠٢٠.